سڈنی دہشتگردی، معمر جوڑے کی حملہ آور کو روکنے کی ویڈیو سوشل میڈیا پر وائرل

آسٹریلیا کے ساحلی علاقے بوندی میں فائرنگ کے ہولناک واقعے کی ایک ویڈیو سوشل میڈیا پر تیزی سے وائرل ہو رہی ہے، جس میں ایک معمر جوڑا مسلح حملہ آور کو روکنے کی کوشش کرتا دکھائی دیتا ہے۔

ویڈیو میں نظر آنے والا جوڑا بوریس گورمین اور سوفیا گورمین ہے جو حملہ آور کے سامنے ڈٹ جانے کی وجہ سے اپنی جان سے ہاتھ دھو بیٹھتا ہے۔

ڈیش کیم سے ریکارڈ کی گئی یہ ویڈیو میں دیکھا جا سکتا ہے کہ بوریس گورمین حملہ آور کو قابو میں کرنے کے لیے اس کی گاڑی کے قریب جاتے ہیں جبکہ ان کی اہلیہ سوفیا بھی ان کا ساتھ دیتی ہیں۔

ویڈیو میں یہ بھی دیکھا جاسکتا ہے کے چند لمحوں بعد فائرنگ کی آوازیں سنائی دیتی ہیں اور ویڈیو اختتام پذیر ہو جاتی ہے۔

وائرل ویڈیو منظرِ عام پر آنے کے بعد دنیا بھر میں معمر جوڑے کی جرات اور قربانی کو سراہا جا رہا ہے۔ صارفین کی جانب سے اس جوڑے کو “اصل ہیرو”، “انسانیت کی مثال” اور “بے خوف شہری” قرار دیا جا رہا ہے۔

سوشل میڈیا پر متعدد لوگوں نے لکھا کہ بوریس اور سوفیا نے اپنی جان خطرے میں ڈال کر دوسروں کی زندگیاں بچانے کی کوشش کی۔

معمر جوڑے کے اہلِ خانہ کے مطابق بوریس اور سوفیا گورمین عام شہری تھے، تاہم مشکل وقت میں ان کا غیر معمولی حوصلہ اور جرات پوری دنیا کے لیے مثال بن گیا۔

خاندانی ذرائع یہ بھی کہتے ہیں کہ اگرچہ یہ ویڈیو دیکھنا ان کے لیے تکلیف دہ ہے، مگر انہیں فخر ہے کہ ان کے پیاروں نے خوف کے بجائے انسانیت کا راستہ اختیار کیا۔

پولیس کا کہنا ہے کہ واقعے کی تحقیقات جاری ہیں اور سوشل میڈیا پر گردش کرنے والی ویڈیو کو بھی شواہد کے طور پر شامل کر لیا گیا ہے۔ حکام نے عوام سے اپیل کی ہے کہ ویڈیو شیئر کرتے وقت متاثرہ خاندان کے جذبات کا خیال رکھا جائے۔