والدہ نے کیا بتایا ؟
کراچی کے علاقے سرجانی سیکٹر 50 ای میں سترہ دسمبر کو اٹھارہ سالہ کومل کی تشدد زدہ لاش گھر سے برآمد ہوئی۔ پولیس کے مطابق مقتولہ کی شناخت کومل کے نام سے ہوئی، جسے شدید تشدد کے بعد قتل کیا گیا۔
کومل کی والدہ بتایا کہ بیٹی نے ایک سال قبل پسند کی منگنی کی تھی۔ منگیتر راشد مگسی، جو خاندانی رشتہ دار بھی تھا، کے ساتھ جھگڑوں کے باعث کومل نے کسی اور نوجوان سے شادی کر لی۔ والدہ کے مطابق شادی کے بعد کومل کو شوہر کی جانب سے بھی تشدد کا سامنا رہا۔
بعد ازاں کومل نے اپنے سابقہ منگیتر سے دوبارہ رابطہ کیا، جس نے قرآن پر ہاتھ رکھ کر اس کا ساتھ دینے کا وعدہ کیا اور خاندان کو علیحدہ گھر لینے کا مشورہ دیا۔ والدہ کے مطابق واردات کے روز وہ گھر سے باہر تھیں، واپس آنے پر دیکھا کہ بیٹی کی لاش کمبل میں لپٹی پڑی تھی۔ مقتولہ پر شدید تشدد کیا گیا، کان کاٹا گیا اور دیواروں پر خون کے نشانات موجود تھے۔ لاش کے قریب پانا بھی پڑا ہوا تھا۔
کومل کی والدہ نے الزام عائد کیا کہ قتل اس کے سابقہ منگیتر نے کیا، جس نے بعد میں فون کر کے کہا کہ "میں نے بدلہ لے لیا۔"
واقعے کے بعد پولیس نے تحقیقات شروع کر دی ہیں۔ اہل علاقہ کے مطابق یہ واقعہ غیرت کے نام پر قتل کا شاخسانہ ہو سکتا ہے۔ مقتولہ کے اہل خانہ انصاف کے حصول کے لیے حکام سے اپیل کر رہے ہیں۔