نواز شریف کی پاکستان میں تعمیراتی سیاست نے نعرے بازی اورسیاسی شعبدہ بازی کو دفن کر دیا: شہباز شریف

وزیراعظم شہباز شریف نے گوجرانوالہ میں ماس ٹرانزٹ منصوبے کا سنگِ بنیاد رکھنے کی تقریب سے خطاب کرتے ہوئے کہا کہ سابق وزیراعظم نواز شریف نے پاکستان میں تعمیراتی سیاست کی بنیاد رکھی، جس نے نعرے بازی اور سیاسی شعبدہ بازی کو دفن کر دیا۔

وزیراعظم نے کہا کہ نواز شریف کی قیادت میں پنجاب میں پہلی مرتبہ ترقیاتی منصوبوں کے ذریعے عوامی خدمت کا آغاز ہوا، جس نے عملی سیاست کو فروغ دیا۔ انہوں نے مزید کہا کہ آج مریم نواز اپنے والد کی میراث کو کامیابی کے ساتھ آگے بڑھا رہی ہیں اور تعمیر و ترقی کے سفر کو جاری رکھے ہوئے ہیں۔

شہباز شریف نے اس موقع پر کہا کہ گوجرانوالہ کا ماس ٹرانزٹ منصوبہ عوام کو جدید سفری سہولتیں فراہم کرے گا اور شہریوں کی روزمرہ زندگی میں آسانیاں پیدا کرے گا۔ انہوں نے زور دیا کہ یہ منصوبہ نہ صرف عوامی سہولت کا ذریعہ ہے بلکہ پاکستان کی ترقی اور خوشحالی کی جانب ایک اہم قدم بھی ہے۔

وزیراعظم نے کہا کہ تعمیراتی سیاست ہی ملک کو آگے لے کر جا سکتی ہے، اور یہی وہ راستہ ہے جس پر مسلم لیگ (ن) گامزن ہے۔ انہوں نے عوام سے اپیل کی کہ وہ ترقی کے اس سفر میں حکومت کا ساتھ دیں تاکہ پاکستان کو جدید دور کے تقاضوں کے مطابق ڈھالا جا سکے۔