واقعے کی مختلف پہلوؤں سے تفتیش جاری
موہالی:بھارتی ریاست پنجاب کے شہر موہالی میں جاری کبڈی ٹورنامنٹ کے دوران اس وقت ایک دلخراش واقعہ پیش آیا،جب نامعلوم حملہ آوروں نے سیلفی کے بہانے فائرنگ کر کے کھلاڑی رانا بالاچوریا کو ہلاک کر دیا۔
بھارتی پولیس کے مطابق موٹر سائیکل پر سوار دو سے تین افراد کبڈی گراؤنڈ میں آئے اور کھلاڑیوں کے قریب جا کر تصویر بنانے کا بہانہ کیا اور فائرنگ شروع کردی۔
پولیس کے مطابق رانا بالاچوریا کے چہرے اور جسم کے اوپری حصے پر چار سے پانچ گولیاں لگیں،ہپستال منتقل کیا گیا مگر وہ زخموں کی تاب نہ لاتے ہوئے دم توڑ گیا۔
پولیس نے بتایا کہ واقعے کی مختلف پہلوؤں سے تفتیش جاری ہے اور اس وقت کسی حتمی نتیجے پر پہنچنا قبل از وقت ہے۔ علاقے کو گھیرے میں لے کر شواہد جمع کیے جا رہے ہیں اور واقعے کو گینگ وار کے پس منظر میں بھی دیکھا جا رہا ہے۔
دوسری جانب بدنام زمانہ بمبیہا گینگ نے سوشل میڈیا پر ایک بیان میں اس قتل کی ذمہ داری قبول کی اور دعویٰ کیا کہ رانا بالاچوریا نے پنجابی گلوکار سدھو موسے والا کے قاتلوں کو پناہ دی تھی، جس کی وجہ سے انہیں ہلاک کیا گیا۔
یہ واقعہ پنجاب میں کبڈی کے دوران سیکیورٹی اور کھلاڑیوں کی حفاظت کے حوالے سے ایک اہم بحث کو جنم دے رہا ہے، اور حکام نے شدید سیکیورٹی اقدامات اور تفتیشی ٹیموں کی تعیناتی کا اعلان کیا ہے۔