سڈنی میں دہشتگردی، پاکستان سمیت مسلم دنیا کی مذمت، آسڑیلیا سے اظہار یکجہتی

صدر مملکت آصف زرداری نے سڈنی میں ہونے والی دہشتگردی میں ہلاک اور زخمی ہونے والوں سے  ہمدردی کا  اظہار کرتے ہوئے  کہا ہے کہ پاکستان خود دہشت گردی سے شدید متاثر رہا ہے، ایسے حملوں سے معاشروں کو  پہنچنے والے درد اور صدمے کو بخوبی سمجھتے ہیں۔

وزیراعظم شہباز شریف نے سماجی رابطے کی ویب سائٹ پر اپنے پیغام میں کہا کہ پاکستان ہر قسم کی دہشت گردی کی مذمت کرتا ہے، ہم اس مشکل گھڑی میں آسٹریلیا کے عوام اور حکومت کے ساتھ یکجہتی کا اظہار کرتے ہیں۔

قطر کی وزارتِ خارجہ نے اپنے بیان میں کہا ہے کہ قطر ہر قسم کے تشدد، دہشت گردی اور مجرمانہ کارروائیوں کو ان کے محرکات یا وجوہات سے قطع نظر مسترد کرتا ہے۔

سعودی عرب کی وزارتِ خارجہ نے بھی سڈنی میں ہونے والے دہشت گرد حملے کی مذمت کرتے ہوئے کہا کہ مملکت ہر طرح کے تشدد، دہشت گردی اور انتہاپسندی کے خلاف اپنے اصولی مؤقف پر قائم ہے۔

متحدہ عرب امارات کی وزارتِ خارجہ نے کہا کہ یو اے ای ایسے تمام مجرمانہ اقدامات کی سختی سے مخالفت کرتا ہے جو امن و استحکام کو نقصان پہنچانے کا سبب بنیں اور ملک ہر قسم کی دہشت گردی اور تشدد کو مکمل طور پر مسترد کرتا ہے۔

اردن کی وزارتِ خارجہ نے بھی واقعے کی مذمت کی،ادھر افریقی یونین کمیشن کے چیئرمین محمود علی یوسف نے بھی سڈنی میں ہونے والی فائرنگ کی سخت مذمت کی۔

ترکیہ نے بھی اتوار کے روز سڈنی کے بونڈائی بیچ پر ہونے والے دہشت گرد حملے کی مذمت کی۔ ترک وزارتِ خارجہ کے مطابق یہ حملہ 14 دسمبر کو حنوکا کی تقریبات کے دوران کیا گیا۔

ایرانی وزارت خارجہ کے ترجمان اسماعیل بقائی نے کہا کہ انسانوں کے قتل اور دہشت گردی کی ہر شکل، چاہے وہ دنیا کے کسی بھی حصے میں ہو ناقابلِ برداشت ہے۔