گورنر سندھ کی تبدیلی پر مشاورت کی تصدیق، اگلا گورنر کون ہوگا؟؟

وزیراعظم کے مشیر برائے سیاسی امور رانا ثنااللہ نے گورنر سندھ کی تبدیلی پر مشاورت کی تصدیق کردی، انہوں نے کہا کہ موجودہ حکومت اپنے اتحادیوں کے ساتھ مل کراپنی مدت پوری کرے گی۔ پارلیمنٹ ہاؤس میں میڈیا سے گفتگو کرتے ہوئے رانا ثنا اللہ نے کہا کہ گورنر سندھ کے تبدیلی پر مشاورت ہوئی ہے، پیپلز پارٹی کے خدشات دور کر رہے ہیں۔ ان کا کہنا تھا کہ پیپلزپارٹی کے ساتھ ہمارے تعلقات بہتر ہیں اور پیپلزپارٹی ہمارے ساتھ ہے، گورنرسندھ کی تعیناتی سے متعلق ہماری مشاورت ہوئی ہے، پیپلزپارٹی کے تحفظات دور کر رہے ہیں۔ ذرائع کے مطابق پیپلزپارٹی نے فیصلہ کیا تھا کہ پیپلز پارٹی وزیراعظم سے رابطہ کرکے گورنر سندھ کامران ٹیسوری کی تبدیلی کا مطالبہ دوبارہ اور مؤثر انداز میں اٹھائے گی۔ اتحادی معاہدے کے مطابق گورنر سندھ کو تبدیل کیا جانا تھا، مگر پیپلز پارٹی کی جانب سے بارہا رعایت دینے کے باوجود یہ وعدہ پورا نہ ہوسکا۔ پیپلز پارٹی کا مؤقف ہے کہ گورنر سندھ وفاق کے نمائندے کے بجائے ایم کیو ایم کے سیاسی نمائندے کا کردار ادا کر رہے ہیں، اور سندھ سے متعلق ”متحرک مگر متنازع“ بیانات سامنے لا رہے ہیں۔ پارٹی نے واضح کیا ہے کہ اگر گورنر کا رویہ ”سندھ دشمنی“ کے زمرے میں آتا ہے تو معاہدے کے مطابق انہیں تبدیل کرنا ضروری ہے۔